Ftit tal-jiem ilu l-gvern ta’ Dr Gonzi habbar amnestija tat-taxxa bit-tama li jigbor arretrati tal-income tax li ilhom snin twal pendenti mhux imhallsa. Skont ir-rapport tal-Awditur-Generali, hemm arretrati ta’ madwar €600 miljun akkumulati meta tinkludi l-imghax, il-multi dovuti u l-ex-officio assessments. Meta jigi kalkolat dak li verament suppost jingabar f’arretrati ta’ income tax, ic-cifra realistika hi aktar vicin tal-€100 miljun.
Fil-qaghda mwieghra li jinsabu fiha l-finanzi tal-gvern, Dr. Gonzi u shabu, apparti li se jibqghu jghabbu pizijiet akbar ta’ taxxi fuq dahar il-poplu li qed jigi mgieghel ihallas ghall-amministrazzjoni hazina tal-istess gvern, issa se jispiccaw jaghtu amnestija li se jgawdu minnha dawk li ma hallsux it-taxxa dovuta kif u meta kien suppost.
Skont din l-amnestija kif mhabbra mill-ministru Tonio Fenech, dawk li ghandhom jaghtu lid-Dipartiment tat-Taxxi Interni jistghu jgawdu minn tnaqqis sa 90% tal-multi u imghaxijiet akkumulati matul is-snin jekk jaccettaw li jwaqqghu l-oggezzjonijiet taghhom u talbiet li kellhom pendenti u jhallsu l-ammonti mnaqqsa sal-15 ta’ Jannar li gej.
Il-gvern ta’ Dr. Gonzi tant jinsab dahru mal-hajt bis-sitwazzjoni finanzjarja prekarja li gab fiha lill-pajjiz, li qieghed jispicca jqaxxar il-qiegh tal-barmil u jgib fix-xejn il-principji tal-moralità fiskali li fuqha suppost hi msejjsa t-taxxa tad-dhul f’pajjizna. L-impjegat li ghandu d-dhul tieghu dikjarat kollu, irid jew ma jridx, ikollu jhallas it-taxxa dovuta sal-inqas centezmu. Fl-istess hin minn jipprova jizgicca t-taxxa billi joqghod jittrattjeni bl-oggezzjonijiet u bit-tkaxkir tas-saqajn, qed jispicca ppremjat b’din l-amnestija a spejjez tac-cittadin onest.
Matul is-snin, inghataw diversi amnestiji u ‘mahfriet’ dwar diversi attivitajiet illegali, bini bla permess fuq art pubblika, boreholes illegali, multi tal-VAT, flus depozitati barra minn Malta li ma kienux dikjarati ghal skopijiet ta’ taxxa, ecc. L-effett ta’ dawn l-amnestiji fuq il-psikologija popolari hu li f’dan il-pajjiz meta tabbuza, ikun jaqbillek tirriskja ghax x’aktarx li tigi ppremjat. Din l-amnestija bhal hafna ohrajn ta’ qabilha flok tikkastiga lil min jabbuza u ma jhallasx it-taxxa fil-hin, tikkastiga lil min it-taxxa jhallasha sal-anqas centezmu meta u kif suppost.
Ippjanar hazin
Veru kaz ta’ ahjar tard milli qatt li l-gvern tal-PN induna xi zball serju kien se jaghmel meta kienu se jithallew barra izjed min-nofs iz-zghazagh li applikaw biex jistudjaw fil-qasam tan-nursing. X’sens kien jaghmel li dawn iz-zghazagh li kellhom il-kwalifici kollha necessarji biex jidhlu l-Università, iccahhadhom mill-opportunità li jsegwu l-kors li xtaqu, meta l-pajjiz ghandu bzonn tant zghazagh li jispecjalizzaw bhala infermiera halli s-servizz fl-isptarijiet jinghata kif suppost?! Certament li ma kienx jaghmel sens li meta applikaw 379 zaghzugh ghall-korsijiet kemm tal-B.Sc fin-nursing u f’livell ta’ diploma, gew accettati biss 140 applikant biex jibdew dawn il-korsijiet. Dan kollu jindika jew nuqqas ta’ ppjanar tajjeb fl-ahjar ipotezi, inkella fl-aghar ipotezi li l-gvern qed jaghmel ekonomija falza li twassal biex l-isptarijiet pubblici ma jkollhom qatt in-numru ta’ infermiera mehtiega biex jinghata servizz ta’ livell gholi kif suppost.
Wiehed jawgura li ghas-snin li gejjin jibqghu jithallew jidhlu izjed zghazagh f’korsijiet avvanzati fil-qasam tan-nursing. Iktar u iktar meta l-pajjiz ghandu bzonn madwar 1400 infermier biex ikun jista’ joffri livell adegwat ta’ servizz medici f’pajjizna, b’madwar 700 li huma mehtiega biex jimtlew il-vacancies li hemm fl-Isptar Mater Dei. Din is-sitwazzjoni ilha tirrepeti ruhha sena wara sena, bil-konsegwenza li minhabba n-nuqqas ta’ infermiera fl-isptarijiet pubblici, kull ma jmur is-servizz medici qed imorru ghall-aghar flok ghall-ahjar.
Fix-xhur li ghaddew, biex itaffi n-nuqqas ta’ infermiera fis-sistema nazzjonali tas-sahha l-Gvern ghamel kampanja ta’ pubblicità permezz ta’ billboards u riklami fuq il-mezzi tax-xandir biex iheggeg izjed zghazagh jistudjaw biex jikkwalifikaw bhala infermiera. Imma meta din il-kampanja ta’ pubblicità kellha r-rizultat mixtieq b’izjed zghazagh li thajru jaghzlu l-karriera ta’ nursing bhala professjoni, kienet xi haga li assolutament ma tinftiex li mbaghad l-gvern kien ser isabbtilhom il-bieb f’wicchom. Huwa dmir tal-gvern li jaghmel minn kollox biex jghin lill-Università ta’ Malta tkun f’pozizzjoni taccetta liz-zghazagh kollha li jkollhom il-kwalifici necessarji biex jibdew kors f’livell ta’ bacellerat u diploma fil-qasam tan-nursing. In-nuqqas li jezisti llum fin-numru ta’ infermiera, huwa tort tan-nuqqas ta’ hila ta’ gvernijiet Nazzjonalisti li tul dawn l-ahhar ghaxar snin f’kull qasam tas-sahha ma kienux kapaci jippjanaw fit-tul u bis-sens.
Il-VAT fuq ir-ristortanti
Ghal ragunijiet li jaf hu, il-Prim Ministru Lawrence Gonzi baqa’ m’accettax li tigi mnaqqsa ir-rata tal-VAT fuq ir-ristoranti f’pajjizna, minkejja li kienet l-Unjoni Ewropea stess li tat din il-koncessjoni li giet uzata minn pajjizi ohra, fosthom Franza. Matul is-sitt xhur li ghaddew, fis-settur tal-lukandi u ristoranti gie registrat l-akbar tnaqqis fl-attività ekonomika f’pajjizna, ta’ ‘l fuq minn 15%.
Mizura li tnaqqas ir-rata tal-VAT fir-rigward tar-ristoranti kieku twettqet, kienet iservi ta’ incentiv biex dan is-settur jirpilja u jizdied in-numru ta’ dawk li jmorru jieklu fir-ristoranti u tingabar aktar taxxa. Bil-pizijiet esagerati u taxxi gholjin li ghabba fuq in-negozju u fl-ahhar mill-ahhar fuq il-konsumaturi, l-attività ekonomika kompliet tistaghgna u l-gvern qed jispicca jigbor hafna inqas f’taxxi.
Subscribe to this comment's feed
| < Prev | Next > |
|---|
